نوحه - میرزا رضا صراف

هرایه گل آتام اوغلو

اخا دوشدوم داخی دیلدن
هرایه گل آتام اوغلو
ویریلدیم باشدان بئلدن
هرایه گل آتام اوغلو
گل ای ایستکلی قارداشیم
بلا بزمینده یولداشیم
بدن ده دؤزمیری باشیم
هرایه گل آتام اوغلو
آخیبدیر باشیمین قانی
توتوب هر سمتی هر یانی
سنی زهرا آنان جانی
هرایه گل آتام اوغلو
منیم سن سیز پناهیم یوخ
داخی امیدگاهیم یوخ
بیر اؤزگه دادخواهیم یوخ
هرایه گل آتام اوغلو
توتوم آرتیق اذیت دیر
ولی عباسه منت دیر
قبول ائت گرچه زحمت دیر
هرایه گل آتام اوغلو
نوارش ائیله عباسه
قتیل قوم نسناسه
ابوالفضل اؤلدی گل یاسه
هرایه گل آتام اوغلو
فلک صبریم آلیب آخر
منی درده سالیب آخر
گؤزوم یولدا قالیب آخر
هرایه گل آتام اوغلو
زبس اوخ سینه مه باتدی
سینیب سینم نفس باتدی
قولوم گئتدی علم یاتدی
هرایه گل آتام اوغلو
اؤلور عباس دلخسته
باخیر بو حاله هر دسته
گل آل باشین دیزین اوسته
هرایه گل آتام اوغلو
غمیم اغیاره بیلدیرمم
بو سؤزدن اؤزگه سؤز بیلمم
جمالین گؤرمه سم اؤلمم
هرایه گل آتام اوغلو
آنام یخودور آچا باشین
تؤکه شوریله گؤز یاشین
آتار کیم نازلی قارداشین
هریاه گل آتام اوغلو
منی گل گؤر جگر داغلا
اؤزون قارداش دئییب آغلا
اؤلورم گل گؤزوم باغلا
هرایه گل آتام اوغلو
دی گل قوی جان وئریم راحت
بو قارداشین چکر حسرت
اولا بیر سنله هم صحبت
هرایه گل آتام اوغلو
بو صراف مصیبت خوان
اولوب مستغرق عصیان
سنی دعوت ائدیر هرآن
هرایه گل آتام اوغلو

*