بایاتی لار

منی جانیم یاندیریر
قاینار قانیم یاندیریر
عالمی اود یاندیرار
منی خانیم یاندیریر
*
صیاد الده کماندیر
اوخون آتما آماندیر
یاری انتظار قویان
یار دئییل پیس زاماندیر
*
قلبی قارا قازاندیر
دیلیم عرضه یازاندیر
فلکه بئل باغلاما
فلک پرگار پوزاندیر
*

ایینه ایله خیاط


سیری در دیوان زنده یاد پروین اعتصامی به زبان ترکی - سراینده حسین پسیانایینه ایله خیاط
ایینه نین دردی دئشیلدی، دئدی خیاطه بئله
آخشام اولدو نه قدر ایشله یه جک سن، سن هله
گئجه گوندوز ووروسان هئی منی سن، بیزلی ییسن
گونده یوز یول قانادیب، بیر دفعه اوف اوف دئمیسن
قانا باتدیم دئمه دین فلسفه سین یارماغیوی
بویا دین قانه منی، هم ده کی اؤز بارماغیوی
بیر دئمیرسن کی اوزون ساپ منی دالدان قووالیر
بعضی وقت من گئدیرم، ساپ قیریلیر یولدا قالیر
باشیم اوسته گئدیرم، دالدان هئی اوسگوهدو وورور
بزیرم لوت گزیرم، سینه ده قلبیم توتولور
درزی حیرصلندی دئدی تعریف ائدیرسن اؤزونو
خالق بیر جوت گؤزونن یاخشی گؤرور دار گؤزونو
سنلی منلی نه قدر یاخشی دی بیر لحظه گئدک
داغیلان قلب لره هیممت ائدیب روفه ائدک
چاغیراق پئسیان ایر تیکمه لی واردیر اوره یین
تیکک اما ائله بیل گؤیده قیریلدیر اله یین
*
آفتاب آذربایجان شماره ۳۹ و ۴۰
*

بایاتی لار

منی ووردو بوز ایلان
گؤزوم دولدو توزیلان
منیم کیمی وارمی هئچ
بوستانی گؤی پوزولان؟
*
عزیزیم تالان جانیم
اودلارا یانان جانیم
وای هارای آتام گئدیب
آتاسیز قالان جانیم
*
عزیزینم بویاندی
باغریم قانا بویاندی
هارای چکیب آغلادیم
سسیمه ائل اویاندی
*
گؤرونور اذان یئری
قبرینی قازان یئری
گؤه سن بیرده گؤرم
گول آتام گزن یئری؟
*