هله ساغدی قارداشین اولمویوب
آنام آغلاما باجیم آغلاما
هله گولشنین گولو سولمویوب
آنام آغلاما باجیم آغلاما
آنامین عزیزه قیزی باجیم ، هله اولما مایل درد وغم
قوشونوم دورار هامی بیر به بیر، هله یاتمییبدی اسیر علم
هله صاحب علم اؤلمویوب ، هله ائتمییبله قولون قلم
هله مشکی قانیله دولمویوب ، آنام آغلاما باجیم آغلاما
هله قوملار اوسته دوشمویوب ، باجی اکبرین قد نورسی
گون او گونده ظلمیله قالمییب ، هله پاره پاره جنازه سی
هله خئیمه لرده اوجالمییب ، گؤیه لیلی نین بالا وای سسی
هله قاره زولفونو یولمویوب ، آنام آغلاما باجیم آغلاما
هله پوزمویوبلا توقاغیمی ، هله رونقی وار اساسیمین
هله قویما ایندی عم اوغلو وای ، دئیه نوعروسینی قاسیمین
هله یاسا باتما چوخ آغلاما ، توتوم ابتدا سید و یاسمین
هله بزم عیشی پوزولمویوب ، آنام آغلاما باجیم آغلاما
هله اؤلمویوب ایکی نورسین ، جگرین باشی هله یانمیوب
هله زولف کاکل اکبرین ، باجی آل قانا بویانمیوب
هله اصغریم آغلاماز هله ، هله ظولم اوخیله اویانمیوب
هله غم بساطی قورولمیوب ، آنام آغلاما باجیم آغلاما
هله آغلاما قالیر آغلاما ، خلقیوین زماندا چوخ یئری
باجی زینب آغلاما ساکت اول ، دئمه ساکت اولماقا یوخ یئری
هله یوخ باشیمدا قلنج یئری ، بدنیمده یوخ هله اوخ یئری
هله اهل کینه یورولمویوب ، آنام آغلاما باجیم آغلاما
بو دیارده ای آنام باجیم ،هله ظولم لجه سی داشمییب
هله لشکر ستم جفا ، سیزه جور و ظولم الین آشمییب
هله خئیمه گاهیم آلیشمییب ، هله عترتیم چؤله قاشمییب
هله کی سکینه سویولمویوب ، آنام آغلاما باجیم آغلاما
هله شیشه دل صافیوی، باجی غم کدورتی باسمییب
هله دین اساسی پوزولمویوب ، هله صر صر ستم اسمییب
هله ظولم عرشه دایانمییب ، هله شمر باشیمی کسمییب
هله گون جمالی توتولمویوب ، آنام آغلاما باجیم آغلاما
هله قلبین ای باجی یانمییب ، یانار اودلار اوسته کباب تک
بو قدر سیزیلداما آغلاما ، هله چکمه ناله رباب تک
باجی قانیمی باجیلار اوزه ، هله یاخمییبدی خضاب تک
هله اهل کین سنه گولمویوب ، آنام آغلاما باجیم آغلاما
هله عشقیله هله هست سن
هامیدان علاقه نی کس رضا
هله کیم حسین پرست سن
بو سؤزیله وئر اونا سس رضا
هله دؤز دردیله مست سن
ندی بو هوی و هوس رضا
هله ساغدی قارداشین اؤلمویوب
آنام آغلاما باجیم آغلاما
حاجی رضا صراف
هیچ نظری موجود نیست:
ارسال یک نظر