بیگانه ده من ده - علی اصغر صادقی

بیر زولفه کؤنول باغلامیشیق شانه ده من ده
زنجیره گرک باغلانا دیوانه ده من ده
سلطان و گدا ، مملکت عشق ده بیر دیر
سارقین دی او گیسولره ، جانانه ده من ده
عشق آتشی بیر یئردن آلوولانمیش ازلدن
بولبولده یانیر ، شمع ده ، پروانه ده من ده
مفتون ائله ییب عالمی بیر دیلبرین عشقی
مجنون دا دوشوب چؤللره ، فرزانه ده من ده
میخانه دیر عالم بوتون اینسان سایی سرمست
ساقی اؤزوده مست دی پیمانه ده من ده
او ماه وشین وصلینه یول تاپماغا خاطیر
کویوندا دوشور توپراغا بیگانه ده من ده
صادق بیزه گر قید و ریا اولماسا حاکیم
زاهد ده یاتار گوشه میخانه ده من ده

هیچ نظری موجود نیست: